Gabaygani waa gabay ka mid silsilad suugaaneedka "Dabargoynta Qabyaaladda"Silsiladdan dabargooynta qabyaaladda ayaa ah Silsilad suugaaneed ay isu xilqaameen, Dhallinyaro Soomaaliyeed oo aqoonyahano,Ardey iyo waxgaradba isugujira oo kala jooga adduunyada daafaheeda.
Silsiladdan ayaa ah Silsilad Suugaaneed lagula dagaallamayo Cudurka dilaaga ah ee la hadhay umadda Soomaaliyeed guri iyo Gobol ay joogtaba, Suugaanta ayaa waxaa la doonayaa inay horseed ka noqoto kacdoon ka dhan ah QABYAALADDA iyo in lagu wacyigeliyo bulshada Soomaaliyeed oo ay qabyaaladdu wiiqdey wadajirkooda iyo wada noolaanshahooda, Silsiladda ayaa ah mid hal ujeedo ka mideysan oo aysan jirin sidii lagu yaqaanay Silsiladdaha Suugaanta aragtiyo kala duwan, balse silsiladdan ayaa ah hal DAWO oo la wada doonayo iyo Cudur caafimaadkiisa la wada goobayo.
Gabay weliba xaladiisa ayuu leeyahay Hal abuur weliba wuxuu ku cabiraya Aragtidiisa wuxuun sheegayaa dhibkeeda iyo qaabka loo dabargooyn karo, iyo sida looga badbaadi karo, Silsilladan ayaa waxay ka billaabatey Baraha xidhiidhka bulshada ee loo yaqaan "FACEBOOK" Golayaal Suugaaneed oo ay dhallinyarada iyo suugaanyahanadu ku kala war qaataan, golahayaashaas ayaa kala a "GOLAHA TARTANKA SUUGAANTA” iyo "GOLAHA ABWAANKA IYO GEEDKA SUUGAANTA" Haddaba gabaygan oo noqon doonaa mid ka mida Silsiladaa kor aan kaga soo hadalnay, waxaa la yidhaahdaa " Qabiil iyo qabyaalad ” bogasho wacan.
1. Qofba aragtidii buu hadlaa, qorina qiiqiiye
2. Qaddarkiis ka badan awrku waa, dheelli qubayaaye
3. Qalad waxaw taqaanbaa midkale, qurux ku sheegaaye
4. Ruux walbaba qumanihiisibaa, qoorta loo suraye
5. Nin qab weyn mid kale oon uqabin, ways qallacayaane
6. Qalbigii insaan Eebbahay, qaybi fahamkiiye
7. Qorshihiyo ujeedkaan rabaan, soo qaddimayaaye
8. Dhegihiinna iiquura waad, wada qancaysaane
9. Afartaas maah-maah qaayaliyo, qani afkeenii dheh
10. Qumbe subaga, qarrog caana geel, kuu qotoma meel Dheh
11. Dhaydoo qabow iyo karuur, qalacsigiisii dheh
12. Afar kalana qoontiyo bugtada, maal ka qubideed dheh
13. Qawmiyad islaamaynu nahay, qeexid shacabkiiye
14. Sunni qawlki nebigood fushiyo, qaalis baan nahaye
15. Diinta duul quweeyaanu nahay, gaalo qaar noqone
16. Dhaqan quruxle baan leenihiyo, qaab wanaag badane
17. Martisoorka qoomka ugu wacan, qaabil waynaga e
18. Magan iyo quweynteedna waa, qurux ku faankeene
19. Isqaddarinta xididkoo kalgacal, kala qaloonaaya
20. Qawl xishood anshaxa muujintiyo, qirid xushmayntooda
21. Qoollaalin eegmada daymada, hoosta u qandoodka
22. Waa edeb qaddiimoo dadkani, qayb uleeyahaye
23. Haddiise aan qullaafyada xun iyo, qaab darrada sheego
24. Qawlkii ilaah iyo xaddiis, suubbanuhu qeexay (scw)
25. Qaanuunka noo qoran ma noqon, qaalis labadaase
26. Qof wuxuu fakaray laguma dhaqo, muumin diin qiraye
27. Taasina qilaaf bay dhashiyo, qaxarka maantaahe
28. Caro qaaddir keenaa darteed, dhiig qul-qulayaaye
29. Roobkiina samadii ma qubin, qarax dhulkeeniiye
30. Quud ay cunaan waaye oo, duunyo qiil malehe
31. Qabno waxaan lahayn waa kuwaas, daadsan qalawgiiye
32. Shacabkiina qaatil baa halligay, qaybi idilkoode
33. Qabiil iyo qabyaaladina waa, laba qaraabaahe
34. Haddii ruuxa qoladiisa aan, qabar laguu sheegin
35. Qorshe gaara uma leexiseen, hiil uqalabayne
36. Qufac iyo dhukaan iyo ka daran, qaaxo iyo booge
37. Qabatoonka nabarkiisu waa, midaan qarsoonayne
38. Qoys aabbe keliyaa bahnimo, loo qallacayaaye
39. Waa qurubka ugu liita hayb, qoonsimada jaane
40. Bah qundhoco dab kala qaadashadi, jooje reer qurace
41. Aano qurunta muu laha qabiil, gawrac qaayiba e
42. Shaydaanku ciidan uu qortiyo, waa qod-qode jaane
43. Ku qal-qaali inuu duul qadfoo, qayrki soo dhaco e
44. Qalin daare weeyaan kulyoon, samuhu waw qiiqe
45. Qadan iyo nasiib xumana waa, qayb u leeyahaye
46. Qof la dilay mid aan qabar ka hayn, bay u qalayaane
47. Qabaar mooggan loxodkiyo qabriga, looga qoday iilka
48. Waxa qaashka loo daray ma oga, qiilka xaajadiye
49. dadka qoriga shiishka u qabtaa, qaaday libin weyne
50. Kuna qawlyay godobtay nin qaba, wuu qufacayaaye
51. Waana lagu quweeyaa markuu, qaanta oofsado e
52. Qiyaamaha markii laysla tagoo, qodob la weydiiyo
53. Kan wax qalay midkuu qoorjaroo, dhiiggu qubanaayo
54. Qaaddirkii abuuruu dacwada, qawl u tebiyaaye
55. Sababtuu qadiibkiyo warmaha, qoriga ii saaray
56. Bal su’aal qubxiga aan faliyo, qaabka dhagartayda
57. Isaguna qamuunyada dibnuhuu, ciil qarsanayaaye
58. Inkir iyo qabweyniyo ma taal, qooq anaa iriye
59. Xukun qadaf la’aanaa markaas, qoorta loo suriye
60. Qurgooyada naf muumina quraan, sheegyay qabarkeede
61. Qiyaamaha maxaa hawl ka dhici, waxaan qardoofayno
62. Qarnigaan casriga waxaan falnaa, ceebti waa quruxe
63. Qaangaarnay eeggoo wataa, qaarba meel dagaye
64. Calammo is qilaafaa bedelay, qoran buluugley e
65. Maro qaabsay reerkii walbaa, qaran u sheegtaaye
66. Qosol faraxle cadawgii wakaa, qiiro tumayaaye
67. Cududdaa lakala qaaday bay, wada qushuuceene
68. Qori keliya markii ay noqdaan, quusay nacabkoode
69. Waa wixii itoobiya qabsaday, qabarki waagiiye
70. Imminkana far quray ugu wacaan, madaxda qayrkoode
71. Xasuusteeni qarameed markaad, qayb kasoo xigato
72. Qamandhaco jiriiricaa kurtaa, qaadi oogada e
73. Afrikada quwadeheed midbaa, qooro naga weyne
74. Inta kale libaax qooqanoo, qaatil nagu sheegye
75. Afartaas qiyaastaan rabiyo, qaabad hadalkay dheh
76. Tusaalaha an qeexiyo runtoon, soo qamaamaday dheh
77. Afar kalana qooraansi iyo, sheeko aan qoray dheh
78. Markii naxashka lagu qaadayee, iilka loo qodayay
79. Ee kacaanku uu yiri qabiil, aasa qurunkiisa
80. Hawl wixii qabya ahaa sidii, loogu qalab qaatay
81. Iskaa wax u qabsadi taam gashiyo, beera qodadkeeni
82. Jahligoo qoraal loo rogiyo, horumar qaabaynta
83. Ina qurac haddii lagu bedelay, jaalle waa quruxe
84. Qalbiga laysu xaar oo dadkii, qayrki wada dhaafye
85. Derisyadaydu quustoo fajace, heerka qalabkay e
86. Qumanaanta waxaa ii lahayd, qoonti aan nacaye
87. Kala qaybshe weeyiyo hurgumo, caabuq soo qubiye
88. Qandho iyo xanuun aan baxayn, qabar xun weeyaane
89. Utun kuu qarsoon weeye iyo, qaras calooleede
90. Qaalalyada suntay qooshtay baa, lagu qarqoomaaye
91. Qunjuraaf wax aan kuu tarayn, sheegyay qabar jaane
92. Qal-qallooca wuxuu kaaga dhigi, toobi qurux weyne
93. Reer hebel haddii ay qabtaan, talada qoomkeena
94. Waxba kuuma quuraan ayuu, kuu qaddimayaaye
95. Markaasaad dagaal lagu qurbaxo, dirir ku qaaddaaye
96. Qori iyo qabyaalad iyo qaad, qayrkeen naga reebye
97. Saddexdaas Qa’ Oo Aan La Qaban,Reerku waa qulube
98. Soomaalaay caqliga qaaliskaa, faham ku qiimeeya
99. Quruxdaa ogow waa midnimo, lagu quwoobaaye
100. Is qabsada gacmaha waxaad tihiin, kalama quustaane.
Curiye:- Xasan Bulxan Cali
Email:- bulxan105@hotmail.com
Fiiro Gaar ah:-
Haddaad dooneyso inaad ka qayb qaaddato Silsiladdan waxaad ku soo gudbin kartaa Gabaygaaga, Bogga Facebooga, ee "GOLAHA TARTANKA SUUGAANTA” iyo "GOLAHA ABWAANKA IYO GEEDKA SUUGAANTA" ama Emailada kala ah:
Xasan Abiib Faarax (Xasan Daaci)Daaci77@hotmail.com
Cabdiraxiin Hilowle Galayr.Galayr1977@hotmail.com
0
Gabayga:7AAD " Qabiil iyo qabyaalad " ee Silsiladda Dabargooynta Qabyaaladda
Gabaygani waa gabay ka mid silsilad suugaaneedka "Dabargoynta Qabyaaladda"Silsiladdan dabargooynta qabyaaladda ayaa ah Silsilad suugaaneed ay isu xilqaameen, Dhallinyaro Soomaaliyeed oo aqoonyahano,Ardey iyo waxgaradba isugujira oo kala joo