Dibadbaxyo rabshado wata ayaa ka billowday magaalada Mandera ee gobolka waqooyi-bari Kenya kaddib markii ciidanka milateriga Kenya ay rasaas oodda uga qaadeen gaari shibil ah, iyagoo dilay labo qof, shan kalena dhaawacay.
Saraakiisha ciidanka ayaa sheegay in dadka la dilay looga shakiyay inay ka tirsanaayeen Al-Shabaab, balse waxaa hadalkaasi beeniyay guddoomiyaha degmada Cali Roba, oo sheegay in dhibbaneyaasha ay ahaayeen "rakaab caadi ah”, isla markaana aanay jirin wax caddayn oo la xiriira inay walxo qarxa ku wateen gaariga.

Milateriga ayaa sheegay in walxo qarxa ay saarnaayeen gaariga, balse dadweynaha ayaa beeniyay.

Roba ayaa sheegay inuu tagay goobta ay wax ka dhaceen, wuxuuna sheegay inuusan walxo qarxa ku arkin gaariga.
Wuxuu ku baaqay in si deg deg ah loo baaro dhacdada.