Waxaan salaamayaa dhamaan bulshada islaamka gaar ahaan bulshada soomaaliyeed waxaan leeyahay Ramadaan kariim hadaan nahay umada soomaaliyeed u malayn maayo maanta nin garaad leh ama xilasamaad ah oo qaangaadhay inuu u degdegayo colaad ama abuuristeeda waxaan taas ula jeeda aduunyadan inta la noolyahay wax badan ayaa ka dhacaya waxaana meel kasta jooga fidna wale iyo xuma abuur waxaan jeclaan lahaa anigoo ku hadlayaa magaca umada soomaaliyeed magaca abwaanada soomaaliyeed magaca dhalinyarada soomaaliyeed in la ilaaliyo walaalnimada iyo derisnimada. Colaadu waad aragta aafada ay leedahay caalamka waxaa tusaale u noqday soomaliya khaasatan koonfur oo madaxweyne kasta marka xukunkiisa la hujuumo carab iyo cajam waxay tusaale ka dhigtaan waxaad noqonaysaan sida soomaliya taas oo macnaheedu yahay waa dad aan garanayn oo ogayn maslaxadooda kana jecel dhibkooda.

Tusaale ahaan waxaa ka dhacay magaalada taleex iyo deegaanka nugaal maaha wax fiican iyada oo lagu jiro bil ramadaan in belaayo loo fara taago maaha wax munaasib ah.

Waxaan kula talin lahaa Xukuumada Somaliland iyo maamulka Puntland inaysan shacabka hadaba abaaraha la daaladhacayaa belaayo u horseedin waxaa laga rabaa golayaasha dhaqanka labada dhinac inay dhexdhexaadiyaan .

Shaqsiga soomaaliyeed waa u xor fekerka uu taageero ninka Somaliland taageersan maaha qasab in lagaga dhigo inuu Puntland taageero, kan Puntland taageersana maaha qasab in lagaga dhigo Somaliland taageero , kan Somaaliya taageersan maaha inuu qasab laga dhigo inuu Somaliland taageero. kan Somaliland taageersan maaha qasab in lagaga dhigo Somaliyaa taageero . kan Somaliland u dhashay ee taageersan soomaliyana maaha in qasab lagaga dhigo inuu Somaliland taageero .

Wadanku waxuu ahaa wadan keliya dhibaatadii dhacday ayaa sababtay kala fogaanshiiyo iyo kalsooni daro wali ma jirto cid dhexdhexaad ka noqotay oo gashay arimaha Somaliya iyo Somaliland wali ma jirto madax ama odayaal ka wada hadlay kala fogaanshaha aragtiyeed waxaa haboon maadaama dalka badidiisa dhibaato ka jirto inta wanaaga samaysatay ee nabada haysta in lagu bogaadiyo lana taageero ee aan dhibaato lagu abuurin. kan dhibaatadu haysatana in la badbaadiyo oo la dhexdhexaadiyo dhinac walba .

waxaa Smaliland amaan ku mutaystay siday shacabkeeda u badbaadisay ee u horu marisay dhamaan dhinacyada bulshada sida , Nabada amaanka dowladnimada hanaankeeda waxbarashada iyo adeega bulshada iyada oo nabadna lagu dhexmaro nabadna lagu joogo.

Sidoo kale puntland waxay gaadhay hanaan siyaasadeed oo la taaban karo iyada oo gobolada kale ee soomaaliya ku dhaaftay nabada iyo nidaamka ay dadka deegaanku samaysteen.

Anigu waxaan odhan lahaa colaadu waa dab , dabkuna maaha wax sahlan lamana huriyo waxaan kula talin lahaa shacabka reer somaliland iyo kan puntlandba inay eegaayaan bal waxa ka dhacaya caasimada soomaaliya iyo gobolada koonfureed walaalaha soomaaliyeed ee habeen walba dhiilada iyo dhibaatada dhex taagan maaha wax ay jeclaysteen ee daalin iyo taloxumaa sidaa u galay maaha inay caqlidaro darteed waxaasi u dhacayaan ee waa aafo iyo ilhaamo ku dhacday waxaa la doonayaa shacabka nabada haystaa inay ku taamilo qaataan oo aysan ku dhicin dhibaatooyinka dhacaya.

Waxaa taas ka sii daran haddii dagaal ka qarxo laascaanood ciidamada ka baxay caasimada muqdisho ee doonaya meel ay ku dhuuntaan oo buuralay ah inay si dhakhso ah ku soo geli doonaan buuraaha silsilada golis ee sool iyo sanaag iyo bari intaba iyaga oo aan shacabka dhulkaas degan u aabe yeelayn .

Waxaan leeyahay intay diriri dhicilayd.Degenida halagu dayo, Derisnimadu waa door haddii nin laga soo qabto magaalo maaha wax guul ah ninka soomaaliyeed ee la qabtayna maaha amxaar ee waa nin dhulkiisa jooga , teeda kale soomaalidu way is dhexmaraysaa, madax iyo minjo, way wada ganacsanaysaa way wada nooshahay, maaha mid keenaysa guul dheeraada ama halgan siyaasadeed inaad nin walaalkaa ah , xabsi ku xidho oo sawiro ka qaado taas waa foolxumo wayn mana aha mowqif siyaasadeed keeni kara ama dhalin kara natiijo.

Dhinaca kale waxaa fiican inay ka roonaadaan oo si nabada ku raadsadaan dadkooda maqan iyaga oo ixtiraamaya bisha barakaysan, iyaga oo ka baarandegaya , waxaa ka dhalan kara waqtigan colaad bilaabata iyo iska hor imaad aan horumar lagu gaadhayn.

Bulshada soomaaliyeed ee kale waxaa kula talin lahaa inay dhamaantood ka qayb qaataan dhexdhexaadinta walaalaha soomaaliyeed , khaasatan dowlada ku meelgaadhka ah maadaama maamul goboleedka puntland hoos tago dowlada ku meelgaadhka ah waa inay madaxda dowladu arinkan ka hadashaa madax dhaqameedyada soomaaliyeed oo dhamina waa inay ka qayb qaataan sidii loo dhex geli lahaa dhacdada ka dhacday taleex si loo badbaadiyo shacabka iyo wada noolaanshaha iyo nabada halkaa ka jirta ilaahayoow sidii khayr leh ka dhig .

Waxaan hadalkayga ku soo afjarayaa , Tixdan

haday dirir wax tari layd

dar horaa ku degi laa

haday duunyo lagu helo

dar horaa ka guran laa

ninka dila walaalkiis

ee dooxa ehelkiis

ee daab u haystoo

bal day dhinacyadaado

daawo nabada wacaniyo

degenidaad ku nooshahay

ninkay deeqi waydee

iska diida samahee

xumaha u degdegayee

durbaanka u garaacdow

waad ku daali doontaa

wallee dahab casaaniyo

dagaal maaha doolaar

ee waa dab iyo hoog

kala dila walaalaha

kala dira dadka isjecel

dumarkoo baroortiyo

da,yartoo dhamaatiyo

dar kaloo ka sii daran

oo daf ku soo yidhaahdiyo

hadhoow kaaga sii dara

iyo danbibaad dhaxlaysaan

intay diriri dhicilayd

degeniada halagu dayo

derisnimadu waa door

derbi weeye adagoo

in la dumiya fiicnayn

duqaydaay u duubtoo

dejiyaay walaalaha

damiyaay xumaatada

ka digaay waxyeelada

daa,imoow alahay

nabad doora oo wacan

dadkoo wax kala qabin

duulkeena soomaal

iyagoo dakano qabin

ka dhig ul iyo diiroo

dulmiba na gaabshee

daacadnimada noo badi

darxumaa na haysee

deeqdaada noo badi

danbibaan samaynee

ha doorin eebooow



aamiin aamiin aamiin



Waa Qalinkii

Cabdiraxiin Hilowle Galayr

Galayr1977@hotmail.com