Mar qura ayaa maanta waxaa dadka oo dhan kedis ku noqotay markii kooxda Manchester United ay ku dhawaaqday in Tababareheeda Sir Alex Ferguson oo ka mid ah Tababareyaashii ugu wanaagsanaa taariikhda Kubadda Cagta Ingiriiska iyo Caalamka uu ka fariisanayo ciyaaraha dhammaadka xilli ciyaareedkan. Ferguson waxa uu xilka Manchester United qabtay 7-dii November 1986-kii
oo haatan laga joogo ku dhowaad 27-sanadood waxaana uu kooxdiisa la
qaaday kaddib 38 Koob oo kala duwan.

Waxa uu Sir Alex oo 71-jir ah marka uu ka fariisto cayaaraha toos ugu
biiri doonaa dhinaca Maamulka kooxda Shayaadiinta Cas cas oo ka yeeli
weysay in uu sidaa uga tago, waxaana ciyaartiisa kama dambeysta ah ay
noqon doontaa kulanka West Bromwich ee 19-ka Bishan.

Haddaba Khubarada Isboortiga ayaa Afkaar kala duwan ka bixisay xil iska
dhiibidda Ferguson.

« Sir Alex waa mid ka mid ah tababareyaashii ugu fiicnaa ee soo mara
taariikhda Kubadda Cagta, 26-sano kaddibna waan sagootinaynaa » sidaa
waxaa boggiisa Twitter-ka ku soo qoray Kabtanka Manchester City *Vincent
Kompany.*

«Waxaan ku faraxsanahay in uu Ferguson naga aqbalay inuu la sii joogo
naadiga isagoo noqonaya Xoghaye » sidaa waxaa yiri *Avie Glazer* oo ka
tirsan Qoyska maamula Manchester United ee reer Glazer.

Goolhayihii hore ee Manchester United *Peter Schumeichel* ayaa isna waxa
uu Twitter-kiisa ku qoray « Waxaan jeclahay in ay isku soo aadi doonaan
sagootinta SAF iyo soo laabashada Cristiano Ronaldo ee Man United ».

Guddoomiyaha Xiriirka Kubadda Cagta Adduunka *Sepp Blatter* ayaa isna
Twitter-kiisa ku daah furay « Hadda ayaan maqlay in Ferguson uu ka
fariisanayo ciyaaraha dhammaadka xilli ciyaareedkan, Guulihiisa iyo
taariikhdiisa ayaa noqon doonta mid jiri doonta, waana mid ka mid ah
Macallimiintii ugu fiicnaa abid ».

Dhinaca kale dhammaan kooxda *Chelsea* ayaa Twitter-ka ku sagootiyay
Ferguson waxaana ay qoraal ay ku soo bandhigeen uu u qornaa
sidatan « Dhammaan Chelsea waxay nasiib wacan u rajaynaysaa Sir Alex
Ferguson marka uu ka fariisto cayaaraha, 26-sano oo wacan ayuu soo qaatay ».

Weli Cayaartoyda, tababareyaasha iyo naadiyada kala duwan ee caalamka
ayaa ka hadlaya daqiiqad walba marka ay maqlaan warkani ah in Ferguson
uu bannaynayo kursiga, waxaana ugu dambeeyay xidiggi hore ee Ingiriiska
iyo Man United *Michael Owen* oo yiri « Waxaan qabaa Man United oo Sir
Alex Ferguson la’aan ah in ay wax ka dhiman yihiin, alla muxuu nin yahay
waqti wanaagsan soo qaatay ».