"Magaalada Muqdisho beryihii u dambeeyay nabadgalyadeeda aad ayay u wanaagsaneyd, waxaa iska kaashaday ciidamada amniga iyo shacbka, waxaan ka hortagnay isku dayo badan, goobaha wax ku qarxin jireen"ayuu yiri Taliyaha Nabadsugida Gobolka Banaadir.

Mar uu ka hadlay howl galadii ugu dambeeyay waxyaabaha ugu suura galay ayuu sheegay inay soo qabteen hub iyo waxyaabo qarxa oo guryo badan ay galeen ka soo heleen.

"Howl galadii dhowaan Muqdisho ka dhacay waxay inoo suura geliyeen meelo badan inaan galno, inaan guryo dhexdiisa godod dhedooda bambooyin iyo qoryo ka soo saarno, macluumaadkaas xogo badan aan raadinay iyo bulshada Muqdisho ee nabada jecel inay nagu saaciday"ayuu yiri Khaliif Ereg.

Khaliif Ereg ayaa sheegay inay la shireen maamulada degmooyinka 16-ka degmo, isagoo xusay in ilaa shan degmo ay ku socoto deriseyn, si ammaanka loo sugo, isla markaana lagu ogaado qofka degmada ku soo kordhay, lana ogaado halka uu ka yimid, taasoo uu tilmaamay in arrintaas ammaanka lagu sugayo.

Taliyuhu ayaa sidoo kale sheegay inay ku guuleysteen in la ogaado dadka guryaha ku kireysan jiray si hoose, isla markaana haatan la bilaabay in guryaha si sharci ah lagu kireeyo, qof laga kireynayo la geeyo Saldhiga booliska ama xarunta degmada si loo ogaado.

"Waxaa ku guuleysanay inaan helno guryihii sida sharci darada loo kireysan jiray, in si sharci loo kireysto, oo ay dadkii bulshada qof kasta wax kireysanaya sharciga soo waafajiyaan qofkaas saldhiga booliska la keeno, maamulka degmada la keeno, meesha uu ka soo guuray la ogaado, taasna ay sahashay in aan cidna cid kale ku qaldamin, qof kasta oo nadiif ah guriga soo dego"ayuu sii raaciyay hadalkiisa.

Howl galo habeen iyo maalin ah ayaa Ciidamada nabadsugida iyo kuwa booliska ka wadaan magaalada Muqdisho, iyadoo xilliyad habeenkii la arko Ciidamo wadooyinka ku baaraya gaadiidka, isla markaana weydinaya aqoonsi.