Mudane Nuunow ayaa sheegay in tallaabada ugu horreysa oo uu qaadayo ay tahay sidii uu ugu shaqeyn lahaa sharciga dalka u yaalla, uuna meesha uga saari lahaa jaha-wareerka iyo kala aragti duwanaanta u dhexeysa xidhibaannada baarlamaanka isagoo tilmaamay in sida ugu dhaqsiyaha badan ay ku sameeyeen isbedello.

"Howlaha aan qabanayno waxaa ka mid ah in baarlamaanka aan ka bedelno kuwii ka horreeyay, waxaana ka shaqeynaynaa sidii ay xildhibaannadu u dhexgeli lahaayeen shacabka ay kasoo jeedaan," ayuu yiri Madoobe Nuunow oo intaas ku daray in wax walba lagu hoggaamin doono sharciga.

Sidoo kale, wuxuu sheegay in si deg-deg ah uu xildhibaanno baarlamaan u diri doono ururka Midowga Afrika, IGAD iyo beesha caalamka si ay ugala soo hadlaan isbedelka dhacay. Isagoo carabka ku dhuftay in doorashadiisu ay tahay mid sharci ah.

"Dadaalkii aan soo galnay wuxuu ahaa mid aan wax ku saxaynay , haddana diyaar ayaan u nahay inaan wax ka bedelo qaabka uu baarlamaanku ku shaqeeyo," ayuu yiri Madoobe Nuunow.

Ugu dambeyn, wuxuu sheegay inuusan wax hambalyo ah weli ka helin madaxweynaha balse uu rajeynayo inuu ku qanco doorashadiisa, isagoo dalbaday in la horkeeno baarlamaanka heshiisyadii la galay oo dhan si loo ansixiyo.

Xildhibaan Madoone Nuunow Maxamed oo shalay ay xildhibaanno baarlamaanka ka tirsan ay u doorteen guddoomiye baarlamaan ayaa waxaa doorashadiisa kasoo horjeestay guddiga ammaanka Qaranka oo uu madax u yahay madaxweyne Sheekh Shariif Sheekh Axmed.