Tababare Jose Mourinho ayaa la fahamsan yahay inuu ku ciqaabay Gonzalo Higuain qaab ciyaareedkiisa hoos u dhacay iyo miisaan ku kordhay culeyskiisa.
Ciyaaryahanka reer Argentiana ayaa lagu soo waramayay in isbuucaan la siiyay afar maalmood oo fasax ah isaga iyo Alvaro Arbeloa iyo Luka Modric, madaama seddexda ciyaaryahan ay ganaax kaga maqnaanayaan kulanka habeen danbe ay Real Madrid la ciyaareyso Rayo Vallecano.

Si kastaba, sida laga soo xigtay Marca, Mourinho ayaa ku wargeliyay Higuain in fasaxiisa laga jaray hal maalin oo laga dhigay seddex maalmood madaama weeraryahanka uu ku jiro qaab ciyaareed liita.

Mourinho ayaa sidoo kale doonaya in ciyaaryahanka uu dib u helo taam ahaanshaha jir ahaaneed, isagoo isbuucyadii u danbeeyay miisaan uu ku kordhay.

Higuain, oo lix kulan aan wax gool ah dhalin ayaa lagu soo waramayaa inuu ka carooday isbedelka lagu sameeyay qorshihiisa fasaxa ee ku qaadan lahaa England.