Adaa Dibnaha duubtayee
Maxaad iga danbaajihee
 
Minaad gaalo la diriree
Deyniile dal ibleys miyaa
 
Minaad gaalo la diriree
Daantii galbeed ma aaddidoo
 
Wahaabiyaa ku soo dirtee
Deyniile dal ibleys miyaa
 
Dalkeygu doqosh maahinee
Iga dareersha daallumkaan
 
Dadnimo Dif ima dheeridee
Ilmaad dagtaad duggaashehee
 
Dadaad laaluushaad ku duntayoo
Dufan bartaad duggaashehee
 
Diintiinnu xaq minaad waddiin
Dowdarradaas ma duufsateen
 
Diintiinnu xaq minaad waddiin
Wada-hadalka ma durteen
 
Nin dalkiisii daafacahaa
Gafuurka duub ma saarayeen
 
Wahaabiyaa ku soo dirtee
Dibnaha duub ma saarateen
 
Salafiyaa ku soo dirtee
Gafuurka duub ma saarateen
 
Asxaabadii ma duubanee
Maxaa gafuurka loo dadaa
 
Wax badanaan idiin dignee
Duxdii soohaad ma daacateen
 
Wax badanaan idiin dignee
Duxdii Faaruuq ma daacateen
 
Wax badanaan idiin dignee
Duxdii Umal ma daacateen
 
Wax badanaan idiin dignee
Duxdii Coloow ma daacateen
 
Dowlaan rabnaa anunkuye
In lay duuduubo doonimaa
 
Danyarta dowladaa u roon
Dadkoo idilna waa Docdaas
 
Dadkiiba waa kala dudyee
Diintaan yaa loo duggaalihaa
 
Ninkii dhadhaab dammoodayoo(xeryaha qaxootiga)
Dabna ridaaya waa dameer
 
Diinteennu dadka wow dhaxeys
Dalkaanse maaha dal carbeed
 
Wadaadki gaalo deeyayoo
Muslinna dooxay waa dareen
 
Dadkaan kala dareerayoo
Dunida yaacay waa dareen
 
Dabo dadoow dabooliddeed
Adoon dadneynin waa dareen
 
Nimaan shisheeye dooxinoo
Sokeeye daadshay waa dareen
 
Dadkii i diida waa riddoow
Daliilka keenay waa dareen
 
Nin is dilaa daartii jannaad
Sidow ku doonay waa dareen
 
Duulkaan duulkii wax soo baroo
Noo soo dardaarshay waa dareen
 
Doqontaan layska duufsadoo
Lasii dabraayo waa dareen
 
Saddaxda degmo dowladdaan
Wixi ku duubay waa dareen
 
Duulkaan digrii laheyninoow
Wixi ku doortay waa dareen
 
Danteenna guud dadaan jeclayn
Wixi u daabay waa dareen
 
Dabinnadaan is dabayaal
Wixi noo daadshay waa dareen
 
Waxaan isku wada dilnoo
oon isku diidnay waa dareen
 
Wixii na kala duujiyoo
Na kala duudshay waa dareen
 
Dowlado goboleedyadaan
Muhuu danbeysa waa dareen
 
Dimuqu-raaddi-nimadaan
La’isku diirtay waa dareen
 
Adduunyadaan duggaafaddaa
Dambaaburteedu waa dareen
 
Damceerreey gaalka daaqsadoo
Lagu daqraayo waa dareen
 
 
Dayac kalaa dammootiyee
Anuu danteyda waa aqaan
 
Waxaanse ku daweey lahaay
Ha layska daayo dabshidkaan
 
Haddii la isku daalana
Dadku waa is dabaqabtaa
 
Sidii dugaag lama rabee
Dadku ways dabaqabtaa
 
Waddani daallanaan ehee
Dowgaan dowgiisa Allow kheyr
 
Dibadaan ku dhammaadayee
Dowgaan dowgiisa Allow kheyr
 
Waxaanse ku dulxaadihaa
Duca sanoo dacniga taal.