(Laacib.net)Tababaraha Real Madird Jose Mourinho oo xaalad adag ay ka soo wajahayso naadiga uu macalinka u yahay ayaa waxaa soo baxay warar sheegaya in uu wadahadal la yeeshay kooxda Paris Saint-Germain bishii hore. Bishii aynu soo dhaafnay ayaa waxaa soo baxayay warar sheegayay in tababare Mourinho iyo madaxweynaha kooxda Florentino Perez ay ku heshiiyeen in Jose uu ka tago kooxda marka uu dhamaado xilli ciyaareedkan kadib markii ay kooxdu aysan si wanaagsan ku bilaaban sanadkan.

Le Sport 10 ayaa daabacday in wakiilka Mourinho Jorge Mendes uu wadahadalo la yeeshay milkiilaha PSG Tamim Bin Hamad Al Thani.

Waxaana wadahadalada xigay sida la sheegay in ay si qarsoodi ah u kulmeen Al Thani iyo Mourinho iyagoo ka wadahadlay sidii uu kooxda ugu soo biiri laha.

Sidoo kale waxaa la rumeysan yahay in Al Thani uu wadahadalo la yeeshay Pep Guardiola iyo Arsene Wenger iyagoo ka wadahadlay suurtogalnimada in ay ku soo biiraan kooxda waxana uu markaa kadib Al Thani uu u wareegay in Mourinho uu yahay qofka bedeli kara Carlo Ancelotti xilli ciyaareedka soo socda.

Wararka ayaa waxa ay sheegayaan in madaxweynaha Real Madrid Perez uu cadeyn doono dhowaan taageeradiisa Mourinho ee ah inuu kooxda la sii joogo Los Blancos inta uu ka dhamaanayo heshiiskiisa oo ku eg June 2016.